14 فبراير 2010

الفلانتين وناسه .....!!!!


اتعلمت طــول عمرى أن الحـب من اسمى المعـانى الجميلة، وما أفتكـرش إننا ممكن نحتـكر كل أحاسيسنا في يـوم واحد،
ده حتى يبقي ظلم ...

وبحسبه بسيطة كده ..
لو بتحب أى حد هل هتستنى يوم 14 فبراير ييجي عشان تعبر له عن حبك بهدية أو برسالة أو بآى حاجة ...!!؟؟
وفي نفس الوقت .......
هل لو مافيش بينك وبين حد عمار ومابتحبهوش كده لله في لله ، هل لما ييجي يوم 14 فبراير هتحبه ؟
طيب ولما يخلص يوم 14 هترجع تكره تانى يوم 15 فبراير ؟
المفروض إننا لو بنحب حد فعلا مانستناش يوم معين ولا مناسبة محددة علشان نعبر عن الحب ده ، بالعكس الحب ده المفروض يظهر دايما وبأشكال مختلفة وفي مواقف متعددة ،

أمــا لو بنكره حد أومش طايقينه سواء بسبب أو من غير سبب فبرضه اليوم ده الاحتفال بيه مش هيخلينا نحبه ونموت فيه، ولو فرض هانحبه فده أكيد مش هيكون بسبب اليوم ده ، لكن بسبب وجود مواقف جمعت بينا وبينه هى اللى غيرت وجهه نظرنا أو خلتنا نفكر من تانى في البنى آدم اللى قدامنا في أنه ميستحقش الكره بل يستحق مننا المعاملة الطيبة . يعنى من الآخر كــــده وبالمنطق والعقل الاحتفالات اللي بتتعمل في اليوم ده مش هيكون ليها تأثير فعلي في تغيير مشاعرنا تجاه اللي بنكرهم او اللي بنحبهم .
ونقدر نقول أن اللي بيحصل في اليوم ده هو عباره عن ( فكر سايد ) مجرد مظاهر وناس ماشية مع الموجة والسلام .
ومش عارفة بصراحة لحد امته هنخلي المظاهر الفاضية تتحكم فينا وتمشينا علي هواها ؟
ولحـد امته هنحـول المعـاني الجميلـة زى الحـب لأشيـاء سطحيـة جـدا ؟

وهل هنفـــضل كـده كتــــير ؟

لحــد لما نفتقدها خالــص وميبقاش لها أى تأثير في حياتنا ؟
ولا ممكـن نعـرف في يـوم من الأيــام أن الحـب معنـاه كبيــر
وأنه مـش ممكن أبداً يتـم إحتكــاره في يـوم واحـد بس
وإلا بقـت بـاقي أيـام السـنه جحيــم ،
كمـــان ما أفتكرش أننا ممكن نزود الحب في اليوم ده زى ماناس كتير بتقول
وده لأن مشــاعرنا دى مـش بزرايـر النـــهاردة هنـحب وبكـرة هنكـره ،
كمـان وده الأهم مش ممكن نخليه مجرد هدايا بغلاف أحمر من بره ملهاش لون ولا طعم من جوه ،،،
وإلا فعلينا وعلي الدنيـا الســــــــــــلام .


هناك 10 تعليقات:

SHAPE YOUR LIFE (ABOALI) يقول...

لمستى كبد الحقيقة وعنقها وفعلا حب اصبح مزيف تحت الاقنعة
واصبح حب يكسوه ثواب عارى

انسان بلا حب حقيقى مثمر فى حياته يساوى جسد عارى

وصدقتى فى كلامك
حب احمر مختفى تحت اللون
وانسان نسى معنى اللون


احييك يا شموسة على ذلك الطرح الراقى جدا وتلك النظرة الواعية

يا انسانة يا راقية

romansy يقول...

لا طبعا الحب عمره ما يقتصر على يوم واحد الحب طول العمر جوانا بس ممكن يكون اليوم دا رمز للحب احساسنا بالحب ساكن فينا دايما احساس راقى حب فى الله بدون ادنى اغراض
الحب مخلوقاتولدجوانا وهيكبر جوانا

أحمد عاطف يقول...

بالنسبة لي انا ... دايما اليوم دا باحب اقضيه نايم

عشان لا اقولها لحد ولا حد يقولهالي


لاني باحس ان العالم كله اصبح معتوه

كله لابس احمر وشايل ورد احمر ودباديب حمره وشايل ورد

ويقول هابي ظلانطيح

مين ظلانطيح دا

ندا منير يقول...

احيانا بنستنى اوقات الاعياد والفرح عشان ننسى الحزن ونتصافى
والانسان بطبعه مشاعره رقيقة من جواه مع اقل مناسبة بينسى كل الخلافات مع وجود استثناءات لكدة

البروفيسير يقول...

السلام عليكم
معك حق تمام
تحياتى

♥نبع الغرام♥♪≈ يقول...

السلام عليكم
شموسه الجميله
كل سنه وانتى طيوبه ياقمر بجد مبسوطه انك زورتى مدونتى وان شاء الله يبقا التواصل
ربنا يسعدك يارب وان شاء الله تحققى كل احلامك
وسنه سعيد عليكى وكل عام وانتى الى الله اقرب بمناسبة مولد سيد البريه محمد صلى الله عليه وسلم
دمتى بكل خير
تحياتى
ايناس

خطى الحبيب يقول...

السلام عليكم,

بداية بحييكى يا شموسة على البوست الجميل دة, لانه فعلا بيمس وطر حساس فى مجتمعنا دينياً واخلاقياً دة غير انه بيرسخ معانى مزيفة فى قلوب الشباب الا من رحم ربى طبعاً.......
معنى جميل زى الحب من الصعب اختذاله زى م قلتى فى يوم واحد او حتى شهر واحد,
للحب معانى كتيره جداً ميقدرش يحس بيها الا اللى عايش فيه,
ده غير اننا بنقلد الغرب وخلاص "تقليد اعمى يعنى" وزى م بيعملوا بنعمل وخلاص"

يقولك عيد حب ماشى
عيد ام ماشى
عيد راس السنة بردة ماشى

ربنا يعافينا حقيقى ويعفوا عنا..

تحياتى ليكى شموسة ومن تقدم لاخر ان شاء الله

دمتى بكل الود والخير غاليتــــى...

كلمات من نور يقول...

أسرة منتدى زبد البحر يتمنى منكم التواجد معنا في منتدى عالم المدونيين والمدونات

http://mhg1962.ba7r.org/forum.htm

شرقيّةُ الهوَى يقول...

فعلا ياشموسه انتى جيتى فى الصميم
والموضوع مش قصت ان ده كلام فاضى وبس
كمان من الناحيه الشرعيه او الدينيه الكلام ده حرام لان احنا مش عندنا غير عيدين بس يجوز لنا الاحتفال بهم وغير كده المفروض انك لو بتحبى حد كونك تشوفيه على طول ويفضل معاكى ويحبك ده عيد فهل معنى كده ان احنا هانعمل فلانتين كل يوم والا ايه
يلا ربنا يهدى الشباب وتسلمى بجد
وجزاكى الله كل خير على هذا الموضوه
دمتى بكل ود

مروه زهران يقول...

جزاكى الله خير " كلام رائع "